Duha ka Balak

By Paul Randy P. Gumanao
Poetry

Namantala na ang “Ping-it nga Pagdapit” sa Kabisdak ug ang “Sa Higayong Ako Angoangohon” sa Dagmay.

Ping-it nga Pagdapit

Dali dinhi, mahal, sa Kidapawan
Diin ang yuta tabunok, dali rang manglunhaw…

Dinhi ta magtagbaw og sabwag sa mga binhi
Ug saksihan natong moturok, motubo, mokatay
Paingon ngadto sa kabungtoran diin ang mga tubod
Gawasnong modagayday paingon
Dinhi sa patag. Apan sama sa atong gugma
Nga usahay kinahanglang pug-an
Mahubas pod ra ba ang tinubdan. Gani,
Nakat-onan nato niining panahona
Nga dili lang diay tubig ang mobuhagay gikan sa bukid
Ug dili lang taghoy sa mga kahoy ang molanog
Samtang ang singgit sa mga gikapoy duyog
Sa daguok sa mga tiyan. Unta, wala sabwagi
Og bala ug wala bisbisi og dugo ang kayutaan.

Nindota unta kon duna pay laing mamunga.
Dali dinhi, mahal, sa Kidapawan!

 

Sa Higayong Ako Angoangohon

Kon pananglit abton kog angoango
ayaw paila sa imong tinuod nga ngalan,
ayawg gakos ug labawng ayawg hilak.
Tugoti ko nga matag adlaw bunyagan
ko ikaw og lain-laing mga ngalan.
Ayawg halok. Timan-i nga utok
ug dili ang kasingkasing ang may
panumdoman. Ayaw na paghago
og pakli og bulak kay tingalig dili
nako dawaton, ug tungod giputol
lisod na isumpayg balik sa punoan.
Hulata nga angoangohon sab ka
aron patas tang wa makaila sa usag-usa.
Matag adlaw mag-ilhanay pag-usab.
Ug hinaot nga sa usa ka higayon
magkuyog tang duha sa baybayon
magdula-dula og balas, magtuon-tuon
sa pagtabon-tabon sa lawas.

Advertisements

Inig Kita Kanimo

By Joana Galila
Poetry

Inig kita kanimo sa tindahan,
nakalitok ko og, “Ikaw na!”
Sukad niato, dugay tang nag-uban
ug ikaw akong
giampingan. Ikaw pud kanunayng
anaa ra; kon ako masakitan,
ikaw akong daganan.

Apan usa ka adlaw, nakit-an takang
naglisod, sama sa usa ka kandilang hinay-
hinay og kalanay.
Gihuyop-huyopan ug gipitik-pitik taka
hangtod sa mibuhi ka
sa akoang kamot.

Nawala na dayon ka.

Misulay ko og pangita og lain
apan dili ka mawagtang
sa akong hunahuna.

“Asa na ka?”

Sa kaluya, miduko ko
ug nakit-an ang usa ka payat
nga lawas. “Ikaw!”
Mipahiyom ko ug militok,
“Daghan pa tang isulat.” 

Kamatayon

By PG Murillo
Poetry

Dili kuno ko kahibaw
makig-uban, kanunayong

nag-inusara
tungod sa giatubang
nga suliran.

Apan ang kamatuoran: bisyo
nako ang pagkulit

og mga pulong. Ballpen ug papel
ang akong hinigiban
sa bisan unsang kahoyng
nitubo sa akong kasingkasing.
Kini ang pamaagi
sa pagpagawas

sa akong gibati nga mura ba og

ako

ray nabuhi niining kalibutana.

Labaw pa kini

sa giingon nilang ‘Death Note’ 

kay usa kining paagi

sa pagpatay sa tinuod

kong pagbati.

Kung Ako ang Pasultihon

by Hannah A. Leceña (Poetry)

Kung ako ang pasultihon,
ang gugma susama sa usa ka makalilisang nga baha,
mihakop, mitabon, ug ako napusnga.

Kung ako ang pasultihon,
ang gugma kay usa ka sulog
nga midagit kanako,
ug wala ako makaikyas,
dinhi ra igo.

Kung ako ang pasultihon,
ang gugma dili gayod kaya tukiun.
Usahay, magdala kinig kahayag sa kagab-ihon;
usahay, maoy hinungdan sa lunop ug kamatayon.

Kung ako ang pasultihon,
wala akoy laing masaysay
kon ugaling ang mahigugma
kay dili sayon magbansay-bansay,
apan ang tinuod nga gibati makahuwat man intawon,
unya, karun, o sa taliabot nga panahon.