Ikaw, Labing Gamhanan

Ni Luis B. Bahay Jr.
Balak

Misabwag og kahumot ang hangin dihang
Mibukad ang imong mga buwak
Dabong, hamis, ug husto ang kaanyag.
Midugang ang langit og paambit sa kahayag.

Minglaray ang mga mananap nga naibog
Ug kanimo sila miduyog, apan
Ako nga ulod naningkamot og kamang
Langayan ug way mga pako.

Gani andam kong matusok sa imong mga tunok.
Uyon ko magpakalumos sa mga pisik sa uwan
Aron ikaw akong maduolan, kuyogan
Sa imung kadyot nga pag-inusara.

Talikdan man ka sa alindahaw ug buyog.
Inig huma’g pangulitawo kanimo
Timan-i nga ania ra ko sa ubos,
Sa ugat, sa sanga, ug sa udlot nga dahon
Kanunayng motangla kanimo.
Palihog, ayaw sa og kalawos
Huwata ang higayon nga ako mahimong alibangbang
Aron atong saw-an ang adlaw nga mosubang