Paglisan

By Adrian Pete Pregonir
Poetry

Di ko alam kung paano lumubog
ang bangka at bultu-bultong takot.

Sa dagat pa lamang ay pinaghiwalay na
tayo sa ating pinagsamahan.

Walang lisyang binuhay rin ng ginamos
at danggit sa ating mesa ang pagkaguang natin.

Bawat húling isda ay pangarap na nasagot,
may sumasabit pang katanungan sa bawat sagot:

Kung bakit ang dagat ay maalat,
kung bakit mapangahas ang simoy ng amihan

hanggang noong pagsug-alaw
ng bagong taon.

Hinintay kita sa pampang
habang nakamatyag sa nangungulilang buwan.

Sa oras na iyon mapayapa ang dalampasigan.
Nasa aking isipan ang nakakabit na mitsa sa iyong bangka.

Hindi ka na nakabalik.
Pagkabúkas, pagbukas ng radyo,
narinig ko na lang:

Kinulong ka sa ibang bansa.
Nagnakaw ka sa isang dagat na pinag-aawayan

para sa ating magiging handa.

Advertisements