by Louise Ouano (Poetry)

Ang kakalma sa hanaw

Ug ang bidlisiw sa adlaw

Mibusikad sa akong mata

Ang akong kaguol nawala

 

Ug samtang ang adlaw

Gasayaw-sayaw

Way laing tugtog kon dili ang kamingaw

Niining kalimtanong paghanduraw

 

Ug wa namatikdi ang pag-agi sa dag-om

Kon di tungod sa kasingkasing nga gahaguros

Nga maoy signos sa pagbundak

Sa uwan nga hapdos

 

Murag way katapusang hagdan

Ang pagbuntog niining kakulian

Duyogan ra’g pinugos nga katawa

Ang tayhop sa kalipay dali ra maakoa

 

Sama sa ulo sa posporo

Sa usa ka kidlap dayon maabo

 

Dili gayod sayon maglakaw

Kon ang kasingkasing gabanaw

Sa pagmahay, kasakit, ug kahadlok

Ang pagkatawo maghinay-hinay og kadugmok

 

Apan taliwala niining kahimtang

Ang paglaum di mawagtang

Niining kinabuhia, ang tayhop sa kalipay

Bisag magkinaunsa padayong modagayday.